سياسة على المسنجر

الحمد لله والصلاة والسلام على سيدنا رسول الله وآله وصحبه ومن وآلاه...

لسة كنت بتكلم مع بنت على المسنجر , هي من الناس إللى ليهم فضل عليا ومَعَزة كبيرة وخاصة جدا عندي على الرغم من أنها فى محافظة أخرى ومش شفتها قبل كدة لكن جدعة جدا معايا وبحمد ربنا اني اعرفها ...


الحوار تطور بينا ودخلنا في موضوع الحزب الوطني إللى هي من ألد أعداءه وانا بصراحة مش من ألد أعداءه , دون إطالة قلنا كلام كتير في نقاشنا, أستوقفتنى بعض اجزاء من كلماتها هستعرضها معاكوا...
وقبل ما استعرضها معاكوا اقول حاجة تعتبر قانون بالنسبالي:

لو أشوف حاجة غلط فى الحكومة وأقول دي صح أبقي نصاب.
ولو اتهمت الحكومة بحاجة أنا مش معاي عليها دليل رسمي عليها أبقى نصاب اكبر.
ولو ذكرت عيوب الحكومة وانكرت إنجازاتها او العكس ياااااااه دا من افظع الأعمال عندي.

ودة للأسباب الأتية

لأن ربنا بيقول : ( يَا أَيُّهَا الَّذِينَ آمَنُوا اجْتَنِبُوا كَثِيراً مِّنَ الظَّنِّ إِنَّ بَعْضَ الظَّنِّ إِثْمٌ ) وسيدنا رسول الله صلى الله عليه وسلم بيقول (المستشار مؤتمن) و رجلا سأل النبي صلى الله عليه وسلم عن الشهادة فقال : هل ترى الشمس ؟ قال نعم , قال : (على مثلها فاشهد أو دع ) و يقول : (لأن أخطئ فى العفو خير من أم أخطئ فى العقوبة) ويقول : ( ادرءوا الحدود بالشبهات ) و قال بعض السلف الصالح : (ألتمس لأخي من عذر الى سبعين , ثم أقول : لعل له عذرا اخر لا أعرفه ) وبلاش كلام دكتور على جمعة علشان دا مفتي مصر خلينا فى الدكتور القرضاوي بيقول : (ان سوء الظن من خصال الشر التي حذر منها القرأن والسنة , فالاصل حمل المسلم على الصلاح , وأن لا تظن به الا خيرا , وان تحمل ما يصدر منه على أحسن الوجوه , وان بدا ضعفها , تغليبا لجانب الخير على جانب الشر).

فما أراه خطأً بعيني استنكره واحاول إصلاحه إن استطعت وما لم أراه... أُحسن الظن فيه

والموضوع دة أزدت يقينا به بعد ما قرأت بوست رائع عند ياسمين عن سوء الظن كان اسمه الحافلة وأذكر أنى اتخانقت فى التعليقات مع سالي خناقة سعدّت بها جدا لما قلت نحسن الظن بمبارك واتعلمت منها كتير بصراحة...أستعرض معكم أجزاء مما قالته أختى إللى بكلمكوا عنها على المسنجر معايا بعد ما أستأذنت منها فى نشره باللون الأحمر :

"هديك مثال صغير اد الفتفوته ده ليس علي سبيل الحصر...
عندك حته الاسمده المسرطنه ويوسف باشا والي و اللي كل الناس عارفه انه هو اللي دخل الحاجات دي من اول ما مسك الوزاره واحد زي ده بقاله ليه عشرين سنه فيها؟ ليه متشلش ولا اتحاكمش لغايه دلوقتي؟ اديني عذر واحد لمبارك في الوضوع ده وانا هتكتم خااااالص"

انا معنديش دليل ان يوسف والى هو السبب ولا انه برئ برضه, فلا يمكن أن اكون احد شهود القضية دي , طبعا معرفتش أرد عليها!!


"فيه بطالة ... اديله عذر هيجيبلهم منين شغل!

فيه جوع وحتي رغيف العيش مش لقينه........يعني هيزرع القمح بنفسه! يعني اما انتوا ناس غريبه صحيح!

فيه ازمه في الصحه وتلت اربع المصريين عندهم فيرس سي والقلب والسرطان والايدز نسبته انتشرت جدا .... ايه المشكله يعني الاعمار بيد الله

فيه ازمه في التعليم اللي في اعدادي مش بيعرفوا يقروا ولا يكتبوا..... مش بيعرفوا في الاخر يبقي نحمد ربنا علي كده ونبوس ايدينا شعر ودقن!

مفيش ديموقراطيه...... انتوا عاوزين منها ايه مش لما تلاقوا رغيف العيش الاول!

فيه ابحاث مصريه لو اتنفذت هنبقي اغني دوله في العالم بس مرميه في الادراج...... ابحاث لمين للشعب اللي بالعافيه بيفك الخط ياعم فكك!
فيه ناس مش لاقيه الميه واحنا بلد اطول نهر في العالم.... اللي مش عاجبه يشرب من البحر واحنا الحمد لله عندنا بحرين مش بحر واحد وحصوة في عين اللي شافنا ومصلاش علي الحبيب النبي"


عليه وعلى آله وصحبه افضل الصلاة والسلام مش عايز الموضوع يكون اطول من كدة عليكم هاقول حاجة بسيطة وخلاص ...

البطالة : شوف بلدك محتاجة إيه واعمله وديتها كورس كمبيوتر وانجليزي وتشتغل على طول , وبلاش دى عندك الحزب الوطنى خد قرض واعمل مشروع صغير تخدم بلدك وتخدم نفسك مش هتستنى القوى العاملة يعني!!

الجوع : هل يعقل أن واحد يبقى جعان وقدامه شغل أمن ولا ساعي ولا عامل فى مصنع ولا مندوب مبيعات وميشتغلش وهو اصلا مش معاه شهادة تشغله !! ربنا عرفوه بالعقل ,وفيها إيه لما تقف طابور عيش نص ساعة وتاخد عيش وتمشي , ما انت ظروفك كدة.

المرض :في كلام كتير يتقال أوله أنك تؤمن ان ربنا هو إللى بيجعل هذا مريض ويشفي هذا مش الحكومة وتبقى عارف كمان الدولة تفعل الكثير جدا من تأمين صحي وعلاج بالخارج وجلسات لمرضى السرطان وعلاج بالمجان لبعض الأدوية منها ما هو عالى القيمة اصلا وهناك ضعظ عليها وهى تقصر أيضا وليس عدلا ان نذكر فقط التقصير !!
ولو مصمم تذكر التقصير بس وهتقول ان الموضوع فى الضياع

يبقى خليك إيجابي زي ياسمين
إيجابية حقيقية فى مساعدة المرضى

التعليم : (رأي خاص) التعليم محتاج تطوير ولازم نطالب بالتطوير لكن تعمل إيه لما يكون عندك اخين توأم فى ابتدائى او اعدادي او ثانوي وواحد جاب 100% والتانى جاب 55% والاتنين بياكلوا نفس الأكل ويحصلوا على نفس القدر من العلم ؟ دة مش عيب فى التانى ..جايز , لكنه أكيد برضه مش هيكون عيب فى المُعلم , لكن دة ربما معناه ان تفوقه ليس علمي او أكاديمي واكيد له نواحي اخري متفوق فيها مثلا .

على فكرة انا جبت فى الثانوية العامة 55 من 60 فى العربي بدون درس خصوصي وبحضور الحصة المدرسية فقط (فى عهد حسني مبارك) . اللى قاعد جنبي طول السنة وبياخد دروس ويجيب درجة النجاح بس يبقى:

إما مريض يحتاج العلاج
أو عنده ظروف في بيته
او مستهتر خسارة فيه التعليم المجاني , مثل الغالبية من الشعب المصري.
زي ما انا استهترت بعد كدة فى الكلية وشلت السنة
ومش عارف حاجة فى المحاسبة (اللى هي مجالي)
مال الدولة بمشكلتي بقة ؟؟

وبيني وبينكم اللى بيحصل فى الشعب العربي عموما والمصري خصوصا حاجة بسيطة بالنسبة لما يفعله الشعب في نفسه وبنفسه فخلينا واقعيين شوية إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ وَإِذَا أَرَادَ اللّهُ بِقَوْمٍ سُوءاً فَلاَ مَرَدَّ لَهُ وَمَا لَهُم مِّن دُونِهِ مِن وَالٍ [الرعد : 11]


وبس